من يومين تقريبا كنت باتكلم مع حد عن أسلوب معين في الكلام من شخص ثاني شايفة إنه غلط ومش كويس إنه يتقال، وباتكلم إنه مفروض ما نقبلش بالاسلوب ده، كان رده عليا وقتها، لا ماخلاص احنا اتعودنا...
التعود في بلادنا العربية أصبح سمة أساسية فيها، بس المشكلة إنك بتتعود على الصح والغلط بدون تفرقة ايه اللي فروض أقبل إني اتعود عليه، وايه اللي مفروض أقاوم إني اتعود عليه .
اتعودنا على إن الطفل ممكن يشتم الكبير، وأصبح عادي لما بنسمع..
اتعودنا على إن الموظفين ياخدوا رشاوي علشان يخلصولنا مصالحنا..
اتعودنا على إن الحاجات تغلى ونستغنى عن حاجات علشان الدنيا تمشي وخلاص..
فيه زوجات اتودت إن زوجها يضربها أو يسبها، أو يهينها، علشان تمشي حالها وتحافظ على ولادها...
اتعودنا على القهر والذل، وحتى يوم ما عملنا ثورة اتعودنا بسرعة على لذة الانتصار ونسينا إن النصر محتاج وراه شغل وبذل مجهود..
وبدأنا نتعود على وضع الانقلاب وان السيسي هو رئيس البلد ...
اتعودنا على حاجات كثير جدا، وده المصيبة والمشكلة الكبرى...
التعود بيخلي الانسان يتخلى عن طموحاته... بيخليه يرضى بالوضع القائم ومايحاولش يغيره .. بيخليه يرضى بالقهر والذل ساعات لإنه خلاص اتعود إن ده الوضع العام والمستمر ..
أيوة لو وضعه اتغير هيفرح ويحس إنه أخد حقه، لكنه مش هيسعى إنه يغير الوضع ده بنفسه، هيستنى دايما إن حد تاني هو الل يغيره له وضعه اللي اتعود عليه..
كان فيه مسلسل انتج سنة 1977 اسمه"جذور" بيحكي قصة كونتا كينتي Kunta Kinte، واللي اتاخد من رواية بنفس الاسم، بتحكي قصة العبد الأفريقي اللي اتمسك في أفريقيا ورحل إلى أمريكا، وهناك رفض إن اسمه يتغير، ورفض إنه يكون عبد. المسلسل بيحكي قصته وبيحكي عن مقاومته للتعود على إنه يكون عبد، بيحكي عن محاولات هروبه المستمرة واللي كانت بتنتهي كل مرة بتعذيبه عذاب رهيب ، علشان في أول فرصة بعدها يحاول يهرب تاني..
عبيد كثير حاولوا يقنعوه إنه مفروض يتعود وإنه أصبح عبد خلاص، لكنه رفض إنه يخضع لفكرة التعود، كان عايش علشان يقاوم إنه يتعود يكون عبد لآخر لحظة في حياته.
فيلم Twelve years slave ، بيحكي نفس الفكرة، رفض العبد إنه يتعود على إنه عبد، ومحاولاته الدائمة لمحاولة حصوله على حريته...
من أسوأ ما يصاب به الحر هو أن يتعود على وضع خاطئ، ويكون تعوده بدايه استسلامه له في النهاية، فلا يسعى بعذ ذلك أبدا لأن يغير ما أصاب واقعه من خلل.
ما تتعودوش على الغلط، ممكن تصبروا عليه، وتحاولوا تستحملوه مع محاولاتكم دايما لتغييره، لكن حطوا في دماغكم دايما إن الوضع ده غلط ولازم يتغير في يوم من الأيام.
رواء مصطفى
