ألمانيا الفائزة بكأس العالم

الصورة ده حقيقة فعلا ... مباراة النهائي لكاس العالم كانت يوم الأحد بدأت الساعة 9 مساءا بتوقيت ألمانيا و انتهت الساعة 12 ، و مع تحابيش ما بعد المباراة فالناس فضلت صاحية لبعد الساعة 1 ( ده الناس اللي اتفرجت في بيتها) ،الناس اللي اتفرجت في الشارع اعتقد انهم ما ناموش أصلا ..
يوم الاثنين، مش أجازة ، يوم شغل عادي جدا ، و كتير من ولايات ألمانيا مازال فيها مدارس ..
أقصى حاجة حصلت ان بعض المدارس ( ومش كلها) سمحت إن الطلبة يتأخروا ساعة واحدة الصبح علشان يوصلوا المدرسة ( الحصة الأولى بتبدأ الساعة 8 فمفروض قبل 8 تكون في المدرسة ، يومها سمحوا للطلبة يجوا المدرسة لحد الساعة 9 بدل 8 )..
الدراسة اشتغلت عادي جدا،ايوة حصل نقاش في المدرسة بين الطلبة ،لكن الحصص كلها اتاخدت ، التغير الوحيد اللي حصل انهم لغوا الواجب بمناسبة فوز ألمانيا بكاس العالم ..

الشغل عند زوجي كان شغال عادي جدا برضه،التعليقات على الفوز كانت بسيطة و كل واحد انشغل بشغله ...

احنا كان عندنا موعد مسبق في الحضانة للتعارف علشان بنتي هتدخل في شهر سبتمبر ، و بالرغم من ان الناس موجودة في شغلها من 7 و نصف صباحا ( بعد ليلة مفيهاش نوم تقريبا) و موعدنا كان 3 و نصف العصر، إلا ان مفيش حاجة اتلغت ، و الموعد تم من غير مشاكل ...

الألمان بصفة عامة بيفصلوا بين شغلهم ، و متع الحياة التانية ...

 

رواء مصطفى