" لكل شخص جديد في ألمانيا ، أو بيفكر يسافر يدرس أو يعيش فيها "
فيه بنوك كتير و مختلفة في ألمانيا ، فيه منها الحساب البنكي فيه بيتدفع عليه مصاريف شهرية ، و فيه لا ، بيختلف الموضوع ده من عمر للتاني ، أو من بنك للتاني .
مبدئيا يفضل إنك تعمل بحث عن البنوك في ألمانيا ، و أنواعها " فيه منها تابع للحكومة و منها خاص" و تقرأ عن كل بنك و تشوف أنواع الحسابات عندهم .
من معايير اختيار البنك و بتفرق في التعامل بعد كدة، إن البنك يكون ليه ماكينات سحب نقود كتير و منتشرة في كل مكان ، لإن ده بيسهل عليك بعد كدة ، و يفضل إنك تختار الفرع اللي هتسجل فيه التسجيل الأول ، إنه يكون قريب من بيتك ، علشان في حالة حدوث أي مشكلة تقدر تروح لهم بسهولة .
خلاص اخترت البنك اللي هتتعامل معاه ، فأنت كدة حالة من اثنين ، يا إما عارف ايه نوع الحساب اللي أنت عاز تعمله ، و في الحالة ده ممكن تعمل حسابك أون لاين ، و بيتعبت لك الورق اللي مفروض تمضي عليه كله على البيت ، تمضيه و تبعت معاه صور أوراقك الشخصية ، و في خلال 4 أسابيع تقريبا بتستلم كارت البنك بتاعك " منظومة البريد هنا بتسمح إنالأوراق المهمة ترسل عن طريقه و مفيش خوف إنها تضيع ".
أو إنك هتاخد موعد و تروح البنك تعمل حسابك هناك .
أو إنك مش عارف ايه نوع الحساب الأفضل ليك ، و محتاج مساعدة ، في الحالة ده يا إما بتتصل بأقرب فرع ليك، أو بتتصل بالرقم الرئيسي الموجود على الموقع الالكتروني ، و بيحدد لك موعد في فرع قريب ليك، و بيحدد معاك مين اللي هيقابلك هناك في البنك.
إوعى تنسى تاخد معاك جواز السفر، و الإقامة بتاعتك في ألمانيا ، و يفضل إنك تاخد معاك ورقة التسجيل بتاعة السكن بتاعك .
بتروح في موعدك، بتلاقي الموظف المسؤول منتظرك، بتقعد معاه على مكتب ظريف ، و بيسألك لو تحب تشرب حاجة .
بياخد منك بياناتك ، و يصور جواز السفر و الإقامة ، و يا إما يبدأفي إجراءات انشاء حساب بنكي ليك مباشرة إذا انت عارف نوع الحساب اللي إنت عايزه .
أو يبدأ يشرح لك الانواع المختلفة لانواع الحساب اللي عنده و بناء على اختيارك بيبدأ يعمل حسابك .
ملحوظة : ما تتكسفش تسال أي سؤال بيدور في عقلك، و ما تمضيش على أي ورق إلا و إنت مستريح تماما ، و جميع اسئلتك تم إجابتها ، إسأل مرة و اثنين و ثلاثة لو تطلب الأمر ، المهم تحس إنك فاهم الموضوع كله
بعد ما بتقرر ، بيبدا يخلص اجراءات انشاء الحساب ، و بتمضي على مجموعة من الورق ، و المفروض ما تمضيش على أي حاجة إلا إذا كنت فاهم كل حاجة فيها .
في النهاية بتستلم كارت ورقي فيه رقم حسابك ، و إذا أنت عايز تضيف لحسابك خاصية الحساب الأون لاين ، فبتقدر تستخدم حسابك من وقتها ، بدون سحب أموال من الماكينة ، و في خلال 4 أسابيع تقريبا بتستلم الكارت الممغنط الخاص بيك .
رواء مصطفى
ليست هناك تعليقات:
إرسال تعليق